Minya Cílinannar Mine |
Use diaeresis Do not use diaeresis |
1Perto, sátina Yésu Hristo, i armardonnar i vintiëo Ponto, Galatio, Capparocio, Asio, ar Vişinio, cílinë 2vë epistyo Eruo i Átar, airitienen i Fairëo, cimienna ar liptienna sercëo Yésu Hristo; nai úvëavë lissë lenna ar sérë.
3Aistana ná Eru ar Átar Hérulvo Yésu Hristo, yë vë túra óravieryo ennostanë vë coirëa estelenna enortienen Yésu Hristo et qualmello, 4camnanna ya úhastima ar alavára ar úquélima ar tirna meneldë lenna, 5i tírinë túressë Eruo savienen etelehtienna ya férima apantien i telda lúmessë. 6Yassë samildë alassë; şintavë sí, qui ná maurë, samildë nyérë alavéla úşahtiessen, 7tuvien i tyastië savieldava (ya mirwa ambela malta, ya tyastaina ló ruinë ananta nancarina), laitalenna ar alcarenna ar tárienna i pantiessë Yésu Hristova. 8Lá cénala, melildes; sí lá cénala mal sávala, sessë samildë aly' alassë úquétima ar alcarinqua, 9cámala i metta saviëo, etelehtië fëaiva.
10I tercánor, i nyarner pá i lissë lenna, cenşer ar sácer pá etelehtië sina, 11sácala man i quén yë hya mana i lúmë ya i Fairë Hristo tessë tananë, yë yá nyarnë quentasta i nwalmion Hristova ar i alcarion apa të. 12Ten nánë apantaina i veuyanet lá intë, mal lë, natinen sinë yar sí nyárinë len ínen nyárala mai len, i Aina Fairenen mentaina menello, nati ya ainur mérar henta.
13Etta, tácala i quilta óreldava, ú yulmëo, á samë estel aqua i lissessë cólala len i pantiessë Yésu Hristova. 14Vë híni cimiëo, lá cátinë vë i mailion noa uistimieldo, 15mal vë i Aina tultalo lë, á ná ainor ilya vehtessë, 16pan técina "Nauvaldë airi, an ni airë." 17Ar qui quétaldë aiya i Átaren, yë ú cimiëo ilci náma vë i cardo ilyo, cauressë á vehta i lúmë armarieldava, 18istála i lá ló hastimar, telpe ar malta, náneldë eterúnainë lusta vehteldallo ya parneldë atareldainen, 19mal ló valda sercë Hristo, vë ya alahasta ar mottolóra eulëo. 20Nánes epistaina nó tulcië Mardeva mal apantaina teldë lúmessen rá len 21i senen savir Erussë, yë ortanë së et qualmello ar antanë senna alcar, ien savieldo ar estelo Erussë. 22Opoitieldë fealdar i cimiessë i anwieva alacuvoitë otornonilmenna; yando órello á melë exeldar holmo, 23an anaieldë ennónë, lá hastima erdello mal úhastima, coirëa ar vórëa quettanen Eruo, 24pan: "Ilya hrávë vë salquë ar ilya alcarerye vë lotsë salquëo." "I salquë hesta ar i lotsë lanta, 25mal i quetta Héruo vorë oialë." Ar sin ná i quetta nyarna mai lenna.
To Minya Cílinanar Atta »
(coming soon?) |