Efesoannar Atta
|
Use diaeresis Do not use diaeresis |
1Ar lë, nála qualinë rohtaldassen ar úcareldassen, 2yassen vantaneldë nëa vë i rando mardo sina, vë i heruo i túreva i vistava, i fairëo ya cára sín i yondossen úsaviëo, 3imica i yando ilyë vë peller nëa i mailessen hrávelvo, cárala i íri i hrávëo ar i sanwion, ar nelvë hroassë híni rúşëo, vë yando i exi. 4Mal Eru, nála alya óraviessë, ter túra melmerya yanen melleryelvë, 5ar írë nelvë qualinë i rohtassen, carnë vë cuinë as Hristo, (annanen anaieldë etelehtainë,) 6ar ortanë vë uo, ar tulcanë vë uo i meneldëassen Hristo Yésussë, 7apantien i túlala randassen i rátala almar annaryo máriessë venna Hristo Yésussë. 8An annanen anaieldë etelehtainë savienen, ar sin lá lëo—Eruo i anna, 9lá cardaron, lertien laita insë úqueno. 10An nalvë carmerya, ontainë Hristo Yésussë mani cardannar, yar Eru manwanë yá, vantielvan tessë.
11Etta á enyalë i nëa neldë i lier i hrávessë, i nár estainë Úoscirië ló i nár estainë Oscirië hrávessë carna málinen, 12i neldë lúmessë yana ú Hristo, lanyainë ava i nórë Irrailo, ar ettelëar pá i véri i vando, lá sámala estel, ar erulóra i mardessë. 13Mal sí, Hristo Yésussë, lë i nëa nér háyë né carnë hari i sercessë Hristo, 14an së ná sérelva, yë carnë yúyo er, ar rácala i enya ramba i pandava; 15nancárala i tévië hráveryassë, i şanyë i axanion canwassen, carien i atta insessë er vinya atan, cárala sérë, 16ar envistien yúyo er hroassë Erunna i tarwenen, nahtala i tévië sassë, 17ar túlala, nyarnes mai sérë len i háyë, ar sérë len i hari, 18an senen samilvë i latinië, yúyo vë, er Fairessë i Átarenna. 19Tá etta, umildë ambë ettelëar ar lelyandor, mal naldë asambari i ainoiva, ar maro Eruva, 20carnë i talmassë i sátinaron ar tercánoron, Yésu Hristo insë nála i ondo vinco, 21yessë i ilya ataquë, tulcaina uo, tiuya airë cordanna i Hérussë. 22Yessë lë nár carnë uo yando mardenna Eruva i Fairessë.
Note: This PDF version is currently quite outdated.