Efesoannar Nelde
|
Use diaeresis Do not use diaeresis |
1Casto sina, ni Paulo, mardo mandossë Hristo Yésuo rá len i lier, 2qui é hlarneldë i pano i anno Eruo ya antaina ninna lenna, 3i vë pantiëo apantanes ninna i fólë, vë tencen şintavë, 4yanna polildë, cendala, hanya handenya i fólessë Hristo, 5ya exë nostiessen úmë apantaina i yondonnar atanion vë sí nés apantaina airi sátinaryannar ar tercánonnar Fairessë, 6nás: i lier aryoni uo ar imya hravo ar rantarwar i vando Hristo Yésussë i mára mentanen, 7yo nén carna núro vë i antiëo i anno Eruo ya antaina ninna vë i cardo túreryo, 8inyenna, i ampitya ilyë ainoron, anna sina né antaina i liessen nyarien mai i aleccéşimë almar Hristo, 9ar calien ya i pano i fólëo ya né nurtaina i randallon Erussë, ye ontanë i ilyë, 10apantien sin i yestannar ar i túrennar i meneldeassen i combenen i olë alavéla handë Eruo, 11pá şelma i randaiva, ya carnes Hristo Yésussë Hérulva, 12yessë samilvë i verië ar latinië esteldë ter i savië sëo. 13Etta canin: áva quelë qualmenyassë rá len, ya ná alcarelda.
14Casto sina luhtan occanyanen i Átarenna, 15et yello ilya nossë meneldeassen ar cemenna ná estaina, 16antien sëo lenna, vë i almo alcareryo, túressë náven cárinë tulcë Faireryanen i mitya atanna, 17marien Hristo savienen óreldassen; melmessë tulcaina ar marna, 18polieldan mapa as ilyë i ainor ya i pallië ar andië ar tárië ar núrië, 19ista yando i melmë Hristo ya ráta i istya, náveldan quantaina ilyanen i quantië Eruo.
20Ar senna pólala or ilyë carë anúveavë ya arcalvë hya hanyalvë, vë i túrëo ya cárala vessë; 21senna i alcar i combessë ar Hristo Yésussë ilyannar i nostier i rando i randaron. Násië.
(Currently up to date except for the replacement of nonyarno "foreteller" with tercáno "herald".)