Efesoannar Canta
|
Use diaeresis Do not use diaeresis |
1Arcan etta lë—ni, i mardo mandossë Hérunna—vanta valdavë i nahámëo yo nelde tultaina, 2as ilya nucumnië ar moicië, as lencië rúşessë, tárala quén i exennar melmessë, 3horyala tirë i erdë i Fairëo i nútessë i sérëo. 4Er hroa ar er Fairë, vë yando neldë tultaina er esteldë nahámeldo; 5er Héru, er savië, er tumyalë, 6er Eru ar Átar ilyaron, yë ilyannar ar ilyainen ar ilyassen.
7Ar ilya quenna vëo antanë i anna, vë i lesto i anno Hristo. 8Etta quetis, "Ortala tárienna avaleryanes mando, ar antanes annar atannar," 9ar i, "Ortanes," mana qui lá i yando lantanes i tumnë rantannar i cemeno? 10yë lantala, insë ná yando yë ortala or ilyë i meneli, quantieryan i ilya.
11Ar së antane queni sátinar, ar queni tercánor, ar queni colindor mára mentavë, ar queni mavari ar pëantar, 12i ilvanienna i ainoiva, cardanna mótiëo ataquenna i hroavë Hristo, 13tenna tulilvë—i ilyë—i erdenna i saviëo ar i haniëo i Yóno Eruo, ilvana nerenna, lestanna viëo i quantiëo Hristo, 14umelvan ambë vinir, falastaina ar oscólina ilya súrinen i pëantiëo i rembiessë i atanion, curussë i curwenna i ránëo, 15ar, nála anwa melmessë, polilvë tiuya senna i ilyë, yë ná i cás, Hristo; 16et yello ilya i hroa, tulcaina uo ar nútina uo, ilya nútenen i yantiëo vë cardo lestassë ilya er ranta, i loa i hroavë carë ataquenna inso melmessë.
17Sin, etta, quetin ar vettan Hérussë, áva ambë vanta, vë yando i lier vanta lustiessë sámanto, 18moritainë i óressë návë, lanyainë ava i coivië Eruo, an i úhandë ya ná tessë, an i hrangiessë órento, 19i, ahautië samë nwalma, santë intë i úhampien, carmenna ilya alapoicieva milmessë. 20Mal lë úmë sinen parë Hristo, 21qui é hlarneldes, ar sessë neldë pëantainë, vë anwië ná Yésussë: 22hehtieldë, vë i noa pelië, i yára atan, ya hastaina vë i mailëo huriëo; 23ar návë ceutainë i fairessë i sámaldava; 24ar colë i vinya atan, ya, vë Eru, ontaina failiessë ar airessë i anwiëo.
25Etta, hehtala i huru, á quetë anwië, ilya as asambarerya, an nalvë quén i exëo rantar; 26Á návë rúşië ar áva úcarë, Anar áva núta rúşeldanna, 27ar áva anta nómë i Arauconna. 28I pílala áva ambë pilë, mal ambë á moia, cárala i málinen i mára, samieryan antien i sámalanna maurë. 29Ilya şaura quetta et antoldallo áva auta, mal ya mára ataquenna, i maurë, antien lissë i hláralannar, 30ar áva anta nyérë i airë Fairenna Eruo, yessë neldë carnë tancë aurenna eterúnieva. 31Ilya sárië ar ormë ar rúşë ar yalmë ar naiquetië á návë cólina lello, as ilya ulca, 32ar á návë quén i exenna aşië, mélë, avatyárala immollo, vë yando Eru Hristossë avatyarneldë.