Filémonna Mine
|
Use diaeresis Do not use diaeresis |
1Paulo, mardo mandossë Hristo Yésuo, ar Timoşëo i otorno, Filémonna i melda ar mótar ómet, 2ar Appianna i oşellë, ar Arcipponna ohtar ómet, ar coalyassë i combenna: 3Lissë lenna, ar sérë Erullo Átarelva, ar i Hérullo Yésu Hristo.
4Hantan Erunya, illumë cárala enyalielya cyermenyassen, 5hlárala melmelyo ar i savië ya samilyë i Héru Yésunna ar i ilyë ainonnar, 6polien imya savielyo návë cárala haniessë ilyë mani ya vessë Hristonna, 7an túra alassë samilmë, ar tiutalë melmelyassë, an i hirdi i ainoron anaier ceutainë lyenen, otorno.
8Etta, sámala túra verië Hristossë canien lyen ya ná mára, 9An i melmë ambë arcan, vë enwina Paulo, ar sí yando mardo mandossë Hristo Yésuo; 10arcan lyen pá hinya, yë nostanen i limilden, Onésimo, 11yë nëa lyenna úmára, mal sí lyenna ar inyenna mára, 12yë mentanen lyenna, yë ná hirdinyar. 13Ni mernë hapitas imnenna, manieryan rá lyen nin i limilden i mára mento, 14mal ú námalyo mernen carë munta, náven i máralyo lá vë şangiëo, mal vë írëo. 15An cé sinna oantes talumë, harielyan së oiravë, 16lá ambë vë núro, mal or núro: melda otorno, olë inyenna, mal anolë lyenna, hrávessë ar Hérussë véla.
17Qui, etta, samil ranta uo óni, á camitas vë inyë, 18ar qui hyanneryel, hya samis lucië, á notë sin inyenna. 19Ni, Paulo, tencë mányenen: ni paityuva, quetienyan lá lyen i yando elyë samë lucië ninna. 20É, a otorno, ecë lyen aşyatan Hérussë; á ceuta hirdinyar Hristossë. 21An asámien tancië cimielyassë, tencen lyen, istala i yando or ya quétan caruval, 22ar yando á manwa nin şambë, an samin estel i ter cyermeldar nauvan antaina lenna.
23Eparpa, mardo mandossë óni, tucë lyë rancussen, 24Marco, Aristarco, Léma, Lúca, i mótari uo óni. 25I anna i Héru Yésu Hristo as fairelda.