Efesoannar Mine
|
Use diaeresis Do not use diaeresis |
1Paulo, sátina Hristo Yésuo indómenen Eruo, i ainonnar nála Efesossë, ar sávalannar Hristo Yésussë: 2Lissë lenna, ar sérë Erullo Átarelva, ar i Hérullo Yésu Hristo.
3Aistana ná Eru ar Átar Hérulvo Yésu Hristo, yë manyanë vë ilyë fairëa mánassë i meneldëassen Hristossë, 4vë cilleryelvë sessë nó tulcië mardeva, návelvan airi ar alahastë epë së melmessë, 5umbartala yá vë carienna yondoiva Yésu Hristonen senna, vë i mára írëo indómeryo, 6laitalenna alcarwa annaryo, yallo manyaneryelvë i Meldassë, 7yessë samilvë i eterúnië serceryanen, i avatyarië i rohtaiva, vë i almo annaryo, 8yassë rátaneryë venna ilya handessë ar tercendë, 9apantala venna i fólë indómeryo, vë mára íreryo, ya panyanes yá sessë, 10panossë i quantieva i lúmion, comien i ilya Hristossë, yar i menelden ar yar i cemenden, 11sessë, yessë yando nelvë cílinë, umbartainë yá vë şelmo yëo cárala i ilyë vë i pano indómeryo, 12i návelvan laitalenna alcareryava, i asámië yá estel Hristossë, 13yessë yando lë, hlárala i quetta i anwiëo, i mára menta etelehtieldo, yessë yando, sávala, neldë cárinë tancë i Airë Fairenen i vando, 14yë ná varnassë camnalvo, eterúnienna i hostieva, laitalenna alcareryava.
15Ter sin ni yando, hlárala pá savielda i Héru Yésussë ar i ilyë ainonnar, 16umë hauta hantiessë rá len, cárala enyalië cyermenyassen, 17antien Eruo Hérulva Yésu Hristo, i Átar i alcarwa, lenna fairë handeva ar pantieva haniessë seva, 18an i hendi óreldo anaier calyainë, istieldan ya ná i estel nahámeryo, ya i alma i alcaro i camna sëo i ainossen, 19ar ya i rátala túrië túreryo venna i sávar, vë i cardo i túrëo tuoryo, 20ya carnes Hristossë, ortala së et qualmello, ar tulcala foryaryassë i meneldëassen, 21or ilya yesta ar túrë ar tuo ar hérë ar ilya estaina essë, lá eryavë randassë sina mal yando i túlalassë; 22ar ilyë tulcas nu talyat, ar antaneryes, cás or ilyë, i combenna, 23ya ná hroarya, i quantië seva quantala i ilyë ilyassen.