Efesoannar Lempe
|
Use diaeresis Do not use diaeresis |
1Á návë, etta, hildor Eruva, vë meldë híni, 2ar á vanta melmessë vë yando Hristo mellë lë, ar santë insë rá len, antaina ar yanca Erunna, olmenna nísimiëo.
3Ar úpuhtalë, ar ilya alapoicië, hya milmë, ar áva estaina imica lë, vë ná mára ainonnar. 4Ar soa, ar alasaila quenya, hya rihtië quettaiva, yar umir márë, mal ambë hantalë. 5An sin á ista, istala i ilya úpuhtando, hya alapoica, hya milca—yë ná cordondur—umë samë camna i araniessë Hristo ar Eruo.
6Úquen lë á hurë lustë quettainen, an i rúşë Eruo túla i yondonnar úsaviëo an sin. 7Áva, etta, návë rantarwa tëo, 8an neldë nëa mornië, mal sí cala Hérussë; vë híni calo á vanta, 9an i yávë i calo ilya máriessë ar failiessë ar anwiessë, 10tyastala ya ná írima i Hérunna. 11Ar áva návë rantarwar as i yávelórë cardar i morniëo, mal ambë yando á naitya, 12an yar muinavë carna ló të nár yelwë yando quetien, 13mal ilyë yar naityainë ló cala nár apantainë, an ilya ya apantaina ná cala. 14Etta quetirya, "Á orta, yë húmala ar á orta et i qualmello, ar Hristo calyuva lyë."
15Á cenë, etta, ilvanavë sinen á vanta, lá vë úhandë, mal vë handë, 16rehtala i lúmë, an i auri nár ulcë. 17An sin áva návë sámalórë, mal á hanya ya i indómë i Héruo, 18ar áva quanta limpenen, yassë ná rúcinië, mal á návë quantainë Fairessë, 19quétala immonna liritinen ar lírínen ar fairië lindinen, lírala ar nandala óreldassë i Hérunna, 20hantala illumë pá ilyë, essessë i Hérulvo, Yésu Hristo, Erunna ar Átarenna, 21tulcala immo nu i exi cauressë Hristova: 22i verir nu veruntar, vë i Hérunna, 23an veru ná cás i veriva, vë yando Hristo cás i combeva, insë Etelehtando i hroava. 24mal vë i combë ná tulcaina nu Hristo, sinen yando i verir nu i verur ilyassë.
25I verur, á melë i verir vë yando Hristo mellë i combë ar santë insë rá san, 26airitieryan sa, an poineryas i sovallenen i neno quettassë, 27antien seo insë i maira combenen, lá sámala motto, hya quíni helmo, hya nat sitë, mal náven airë ar alahasta. 28Sinen i verur samir maurë meliëo verintar vë hroantar; yë melë verirya melë insë, 29an úquen nëa moncë hroarya, mal tyaris alë ar alya sa, vë yando Hristo i combë, 30an nalvë rantar hroaryo. 31"An sin nér hehtuva i atar ar i amil, ar verya i veriryanna ar nauvantë—i atta—er hroa." 32i fólë sina ná alta, ar ni quetë, Hristonna ar i combenna, 32I fólë sina ná alta, ar ni quetë, Hristonna ar i combenna, 33ananta yando lë, vë ilquen: sinen á melë verirya, vë insë; ar i veri cimien i veru.